ຖານຂໍ້ມູນດ້ານລະບຽບການຂໍອະນຸຍາດດຳເນີນທຸລະກິດ

ບຸກຄົນ ຫຼື ນິຕິບຸກຄົນທີ່ເປັນພົນລະເມືອງລາວ, ລວມທັງຕ່າງປະເທດ ທີ່ຮ່ວມທຶນກັບຄົນລາວລ້ວນແຕ່ມີສິດສ້າງຕັ້ງວິສາຫະກິດບໍລິການຈັດຫາງານ ໂດຍສອດຄ່ອງກັບລະບຽບກົດໝາຍຂອງ ສປປ ລາວ ແລະ ຂໍ້ຕົກລົງວ່າດ້ວຍ ການສ້າງຕັ້ງ ແລະ ຄຸ້ມຄອງວິສາຫະກິດບໍລິການຈັດຫາງານ 043/ຮສສ

- ບຸກຄົນ ຫຼື ນິຕິບຸກຄົນ ທີ່ຖືສັນຊາດລາວ ຫຼື ຕ່າງປະເທດຮ່ວມທຶນກັບຄົນລາວ
- ມີອາຍຸ 25 ປິຂຶ້ນໄປ
- ມີລະດັບການສຶກສາຈົບມັດທະຍົມປາຍຂຶ້ນໄປ
- ມີສຸຂະພາບແຂງແຮງ ແລະ ສົມບູນ
- ມີຊີວະປະຫວັດຈະແຈ້ງ
- ມີເງິນຄ້ຳປະກັນເວລາຈັດສົ່ງໄປຕ່າງປະເທດ ແລະ ເງິນທະບຽນຂໍອະນຸຍາດສ້າງຕັ້ງ
- ຕ້ອງຍື່ນເອກະສານຂໍອະນຸຍາດດ້ວຍຕົນເອງ
- ບໍ່ຢູ່ໃນໄລຍະລົ້ມລະລາຍດ້ານທຸລະກິດ
- ມີປະສົບການດ້ານການດຳເນີນທຸລະກິດໃດໜຶ່ງມາກ່ອນ ແລະ ຕ້ອງມີວິຊາການດ້ານແຮງງານ
- ມີສຳນັກງານ, ມີອຸປະກອນຮັບໃຊ້, ມີສະຖານທີ່ຝຶກສີມືຂັ້ນພຶ້ນຖານ, ມີບຸກຄະລາກອນທີ່ມີຄວາມຮູ້ຄວາມສາມາດ
- ມີທຶນຈົດທະບຽນສຳລັບຈັດຫາງານພາຍໃນຕ່ຳສຸດຈຳນວນ 200 ລ້ານກີບ ແລະ ເງິນສົດຄ້ຳປະກັນເປັນເງີນກີບ ເທົ່າກັບ 2,000 ໂດລາສະຫະລັດ
- ມີທຶນຈົດທະບຽນສຳລັບຈັດຫາງານພາຍໃນ ແລະ ໄປຕ່າງປະເທດຕ່ຳສຸດຈຳນວນ 2,000 ລ້ານກີບ ແລະ ເງິນສົດຄ້ຳປະກັນເປັບເງິນກີບ ເທົ່າກັບ 20,000 ໂດລາສະຫະລັດ. ເງິນຄ້ຳປະກັນດັ່ງກ່າວໃຫ້ຖອກເຂົ້າບັນຊີຂອງກະຊວງແຮງງານ ແລະ ສະຫວັດດີການສັງຄົມ ກ່ອນການໄດ້ຮັບອະນຸຍາດ ເພື່ອແຮໄວ້ຈ່າຍໃນກໍລະນີເກີດຄວາມຜິດພາດຂອງວິສາຫະກິດ
(ຂໍ້ຕົກລົງວ່າດ້ວຍການສ້າງຕັ້ງ ແລະ ຄຸ້ມຄອງວິສາຫະກິດບໍລິການຈັດຫາງານ, ເລກທີ 043/ຮສສ)

ການບໍລິການຈັດຫາງານ ອາດມີແນວໂນ້ມເກີດຄວາມສ່ຽງໃນການຄ້າມະນຸດ ຫຼື ການຈຳແນກເລືອກປະຕິບັດໃນການຈ້າງງານ. ດັ່ງນັ້ນ, ແມ່ນມີຄວາມຈຳເປັນສຳລັບພາກລັດໃນການຮຽກຮ້ອງຂໍໃຫ້ມີການຂໍໃບອະນຸຍາດສ້າງຕັ້ງວິສາຫະກິດທີ່ຈະປະກອບການນີ້ເພື່ອປ້ອງກັນຄວາມສ່ຽງດັ່ງກ່າວ