ຖານຂໍ້ມູນດ້ານລະບຽບການຂໍອະນຸຍາດດຳເນີນທຸລະກິດ

ຜູ້ທີ່ມີຈຸດປະສົງຕ້ອງການດຳເນີນທຸລະກິດແລກປ່ຽນເງິນຕາ

1. ເປັນບຸກຄົນທີ່ຖືສັນຊາດລາວ ຫຼື ເປັນນິຕິບຸກຄົນ ທີ່ດຳເນີນທຸລະກິດທີ່ຕິດພັນ ເປັນຕົ້ນ ທຸລະກິດການໂຮງແຮມ ແລະ ທ່ອງທ່ຽວ;
2. ດຳເນີນທຸລະກິດມີຜົນກຳໄລ ຢ່າງຕໍ່ເນື່ອງໃນໄລຍະ ສາມ ປີຜ່ານມາ (ສຳລັບນິຕິບຸກຄົນ);
3. ມີທຶນຈົດທະບຽນຄົບຖ້ວນ ຕາມທີ່ໄດ້ກຳນົດໄວ້ໃນມາດຕາ 10 ຂອງຂໍ້ຕົກລົງສະບັບນີ້;
4. ມີປະຫວັດການເຄື່ອນໄຫວຢູ່ ສປປ ລາວ ຢ່າງຈະແຈ້ງ, ບໍ່ມີສ່ວນກ່ຽວຂ້ອງກັບບຸກຄົນ ຫຼື ຜູ້ຕ້ອງສົງໄສໃນສະຖານການຟອກເງິນ ຫຼື ການສະໜອງທຶນໃຫ້ແກ່ການກໍ່ການຮ້າຍ;
5. ບໍ່ເຄີຍຖືກສານຕັດສິນລົງໂທດ, ກຳລັງຖືກດຳເນີນຄະດີ ຫຼື ມີສ່ວນພົວພັນ ໃນສະຖານການກະທຳຜິດໃດໜຶ່ງທີ່ກ່ຽວຂ້ອງກັບ ການສໍ້ໂກງ, ການຍັກຍອກຊັບ ແລະ ການຟອກເງິນ;
6. ບໍ່ເຄີຍຖືກຖອນໃບອະນຸຍາດດຳເນີນທຸລະກິດແລກປ່ຽນເງິນຕາມາກ່ອນ ຍົກເວັ້ນກໍລະນີຂໍຍຸບເລີກດ້ວຍຄວາມສະໝັກໃຈ;
7. ມີສະຖານທີ່ຕັ້ງທີ່ເໝາະສົມ ແລະ ຮັບປະກັນຄວາມປອດໄພໃນການບໍລິການແລກປ່ຽນເງິນຕາ;
8. ມີແຜນປະກອບອຸປະກອນຮັບໃຊ້ ແລະ ນຳໃຊ້ລະບົບທີ່ທະນາຄານແຫ່ງ ສປປ ລາວ ກໍານົດ ເຊັ່ນ: ລະ ບົບລາຍງານການ ຊື້-ຂາຍ ເງິນຕາ, ຄອມພິວເຕີ, ອິນເຕີເນັດ ແລະ ກ້ອງວົງຈອນປິດ, ໂທລະສານ, ເຄື່ອງສຳເນົາເອກະສານ, ເຄື່ອງກວດເງິນ, ເຄື່ອງນັບເງິນ, ເຄື່ອງຄິດໄລ່, ກະດານແຈ້ງອັດຕາແລກປ່ຽນ ແລະ ອຸປະກອນຮັບໃຊ້ອື່ນທີ່ຈຳເປັນ.

ຜູ້ທີ່ມີຈຸດປະສົງດຳເນີນທຸລະກິດແລກປ່ຽນເງິນຕາ ຕ້ອງໄດ້ຮັບການຂຶ້ນທະບຽນວິສາຫະກິດນຳຂະແໜງ ອຸດສາຫະກຳ ແລະ ການຄ້າ, ແລ້ວປະກອບເອກະສານຂໍອະນຸຍາດດໍາເນີນທຸລະກິດແລກປ່ຽນເງິນຕາ ນໍາທະນາ ຄານແຫ່ງ ສປປ ລາວ.
ຕ້ອງປະກອບທຶນຈົດທະບຽນຢ່າງໜ້ອຍໜຶ່ງຕື້ກີບ. ທຶນທີ່ປະກອບເປັນທຶນຈົດທະບຽນແມ່ນທຶນໝູນວຽນເທົ່ານັ້ນ ເຊິ່ງທຶນດັ່ງກ່າວຕ້ອງເປັນທຶນຂອງຜູ້ກ່ຽວທີ່ໄດ້ມາໂດຍຖືກຕ້ອງຕາມກົດໝາຍແລະຕ້ອງຝາກໄວ້ນຳທະນາຄານທຸລະກິດຢູ່ ສປປລາວ