ຖານຂໍ້ມູນດ້ານລະບຽບການຂໍອະນຸຍາດດຳເນີນທຸລະກິດ

ບຸກຄົນ ຫຼື ນິຕິບຸກຄົນ ທີ່ດຳເນີນກິດຈະການໃຫ້ເຊົ່າພື້ນທີ່ຕິດຕັ້ງອຸປະກອນ, ເຊົ່າບ່ອນວາງເຄື່ອງເຊີເວີ, ເຊົ່າໃຊ້ເຊີເວີ, ເຊົ່າພື້ນທີ່ເຊີເວີ, ເຊົ່າໃຊ້ຊອບແວຣ, ເຊົ່າໃຊ້ຖານຂໍ້ມູນ ແລະ ອື່ນໆ ໃຫ້ແກ່ບຸກຄົນ, ນິຕິບຸກຄົນ ແລະ ອົງການຈັດຕັ້ງ.

ຜູ້ຮ້ອງຂໍຕ້ອງປະຕິບັດໃຫ້ສອດຄ່ອງກັບ ມາດຕະຖານດັ່ງຕໍ່ໄປນີ້:
1. ມາດຕະຖານດ້ານທີ່ຕັ້ງ - ຕ້ອງຢູ່ໃນສະຖານທີ່ເໝາະສົມ, ໂຄງສ້າງອາຄານ ຕ້ອງມີຝາອາຄານໜາຢ່າງໜ້ອຍ 20 cm ມີລະບົບປ້ອງກັນໄຟໄໝ້ ຕາມມາດຕະຖານ TIA-942, ພື້ນທີ່ຫ້ອງ ຕ້ອງສາມາດຮອງຮັບນໍ້າໜັກໄດ້ບໍ່ຕໍ່າກວ່າ 800 kg/sq.m; 
2. ມາດຕະຖານດ້ານເຕັກນິກ - ຕ້ອງເຊື່ອມຕໍ່ຫາສູນອິນເຕີເນັດແຫ່ງຊາດໂດຍກົງ ຫລື ຜ່ານຜູ້ໃຫ້ບໍລິການອິນເຕີເນັດ, ຕ້ອງມີອຸປະກອນຕິດຕາມ ແລະ ເກັບກໍາຂໍ້ມູນທັງໝົດຂອງລູກຄ້າ ແລະ ຕ້ອງມີລະບົບເກັບກໍາຂໍ້ມູນສໍາຮອງ; ອຸປະກອນທີ່ໃຊ້ຕ້ອງຖືກຕ້ອງຕາມມາດຕະຖານເຕັກນິກ ຜ່ານການກວດສອບ ແລະ ຮັບຮອງມາດຕະຖານ ໂດຍອຸປະກອນທັງໝົດ ຕ້ອງຕັ້ງຢູ່ໃນ ສປປ ລາວ; ຕ້ອງເຮັດແຜນການຕິດຕັ້ງເຄືອຂ່າຍອຸປະກອນຕ່າງໆ ໃຫ້ສອດຄ່ອງກັບ ເຕັກໂນໂລຊີ ແລະ ມາດຕະຖານ ທີ່ກະຊວງ ກໍານົດໄວ້ແຕ່ລະໄລຍະ; 
3. ມາດຕະຖານດ້ານຄວາມປອດໄພ - ຕ້ອງມີລະບຽບການລະອຽດ ໃນການຄຸ້ມຄອງ, ການບໍາລຸງຮັກສາ ແລະ ລະບົບແກ້ໄຂບັນຫາສຸກເສີນຕ່າງໆ ໂດຍສະເພາະ ວິທີການທີ່ເໝາະສົມ ແລະ ທັນການ ເພື່ອຮັບປະກັນວ່າ ຂໍ້ມູນທັງໝົດຂອງຜູ້ໃຊ້ບໍລິການ ມີຄວາມປອດໄພ ເຊັ່ນ Firewall, Anti-DOS, Filtering

1. ໃບອະນຸຍາດແບບທີ 1 ສຳລັບຜູ້ບໍລິການສູນກາງຂໍ້ມູນຂ່າວສານຜ່ານອິນເຕີເນັດ ຂະໜາດໃຫຍ່ ທີ່ມີອາຄານສະຖານທີ່ເປັນຂອງຕົນເອງ; 
2. ໃບອະນຸຍາດແບບທີ 2 ສຳລັບຜູ້ບໍລິການສູນກາງຂໍ້ມູນຂ່າວສານຜ່ານອິນເຕີເນັດ ຂະໜາດກາງທີ່ບໍ່ມີອາຄານເປັນຕົນເອງ ແຕ່ມີຫ້ອງເປັນຂອງຕົນເອງ; 
3. ໃບອະນຸຍາດແບບທີ 3 ສຳລັບຜູ້ບໍລິການສູນກາງຂໍ້ມູນຂ່າວສານຜ່ານອິນເຕີເນັດ ທີ່ໃຊ້ພື້ນທີ່ໃນຫ້ອງສູນກາງຂໍ້ມູນຂ່າວສານຂອງຜູ້ອື່ນ.

1. ທຳອິດ ແມ່ນຈະອອກໃບອະນຸຍາດຊົ່ວຄາວ ຊຶ່ງມີອາຍຸການ 1 ປີ ແລະ ຫາກສາມາດປະຕິບັດໄດ້ 60% ຂອງແຜນການໃນປີທໍາອິດ ແມ່ນຈະໄດ້ຮັບການອອກໃບອະນຸຍາດສົມບູນ ທັງນີ້ ຖ້າວ່າຜູ້ໄດ້ຮັບໃບອະນຸຍາດຊົ່ວຄາວແລ້ວ ຖ້າຫາກບໍ່ສາມາດປະຕິບັດໄດ້ 60% ຂອງແຜນການໃນປີທຳອິດ  ສາມາດຕໍ່ໃບອະນຸຍາດຊົ່ວຄາວໄດ້ອີກພຽງ 01 ຄັ້ງເທົ່ານັ້ນ ໂດຍຕ້ອງແຈ້ງເຫດຜົນເປັນລາຍລັກອັກສອນຕໍ່ຂະແໜງ ປທສ ພິຈາລະນາ;
2. ດໍາເນີນກິດຈະການ ໂດຍບໍ່ໄດ້ຮັບອະນຸຍາດ ຈະຖືກປັບໃໝ 50,000,000 ກີບ;
3. ບໍ່ເລີ່ມດໍາເນີນການ ພາຍໃນ 1 ປີ ຫຼື ບໍ່ສາມາດປະຕິບັດໃຫ້ໄດ້ຕາມແຜນຢ່າງໜ້ອຍ 60% ຂອງແຜນການແຕ່ລະປີ ຈະຖືກປັບໃໝ 20,000,000 ກີບ
4. ນຳໃບອະນຸຍາດໃຫ້ຜູ່ອື່ນນຳໃຊ້, ເຊົ່າ ຫຼື ໂອນ ຈະຖືກປັບໃໝ 20,000,000 ກີບ;
5. ຕໍ່ໃບອະນຸຍາດດໍາເນີນກິດຈະການຊ້າກ່ອນກໍານົດ 30 ວັນ ຈະຖືກປັບໃໝ 20,000,000 ກີບ