ຖານຂໍ້ມູນດ້ານລະບຽບການຂໍອະນຸຍາດດຳເນີນທຸລະກິດ

ບຸກຄົນ ຫຼື ນິຕິບຸກຄົນ ທີ່ມີຈຸດປະສົງດໍາເນີນກິດຈະການບໍລິການອິນເຕີເນັດ ທີ່ສະໜອງໃຫ້ແກ່ບຸກຄົນ, ນິຕິບຸກຄົນ ແລະ ອົງການຈັດຕັ້ງ. ການບໍລິການອິນເຕີເນັດ ແມ່ນຮູບແບບການບໍລິການໜຶ່ງຂອງການບໍລິການໂທລະຄົມມະນາຄົມທີ່ສະໜອງການບໍລິການໃຫ້ແກ່ຜູ້ຊົມໃຊ້ສາມາດເຂົ້າເຖິງອິນເຕີເນັດໄດ້ດ້ວຍວິທີ່ການເຊື່ອມຕໍ່ແບບມີສາຍ ຫຼື ບໍ່ມີສາຍ ປະກອບມີ 3 ປະເພດຄື: 
- ໃບອະນຸຍາດປະເພດ 1: ແມ່ນໃບອະນຸຍາດສຳລັບຜູ້ໃຫ້ບໍລິການອິນເຕີເນັດ ທີ່ມີເຄື່ອຂ່າຍເປັນຂອງຕົນເອງ, ສາມາດໃຫ້ບໍລິການໃນຂອບເຂດທົ່ວປະເທດ. 
- ໃບອະນຸຍາດປະເພດ 2: ແມ່ນໃບອະນຸຍາດສຳລັບຜູ້ໃຫ້ບໍລິການອິນເຕີເນັດ ທີ່ມີ ຫຼື ບໍ່ມີເຄື່ອຂ່າຍເປັນຂອງຕົນເອງ, ສາມາດໃຫ້ບໍລິການໃນຂອບເຂດແຂວງ/ນະຄອນໃດໜຶ່ງ. 
- ໃບອະນຸຍາດປະເພດ 3: ແມ່ນໃບອະນຸຍາດສຳລັບຜູ້ໃຫ້ບໍລິການອິນເຕີເນັດ ທີ່ມີ ຫຼື ບໍ່ມີເຄື່ອຂ່າຍເປັນຂອງຕົນເອງ, ສາມາດໃຫ້ບໍລິການໃນຂອບເຂດເມືອງໃດໜຶ່ງ.

1. ຕ້ອງມີໃບຄຳຮ້ອງ, ບົດວິພາກເສດຖະກິດ-ເຕັກນິກ ແລະ ເອກະສານອື່ນ ຕາມການກຳນົດຂອງຂະແໜງໄປສະນີ, ໂທລະຄົມມະນາຄົມ ແລະ ການສື່ສານ; 
2. ຕ້ອງມີວີຊາການທີ່ກ່ຽວຂ້ອງ ຢ່າງພຽງພໍກັບປະເພດ ແລະ ຂອບເຂດຂອງການບໍລິການ; 
3. ໃນກໍລະນີມີການນຳໃຊ້ຊັບພະຍາກອນໂທລະຄົມ ແລະ/ຫຼື ກໍ່ສ້າງເຄືອຄ່າຍໂທລະຄົມມະນາຄົມ, ຕ້ອງມີໃບອະນຸຍາດຈາກຂະແໜງໄປສະນີ, ໂທລະຄົມມະນາຄົມ ແລະ ການສື່ສານ; 
4. ຕ້ອງບໍ່ຢູ່ໃນຊ່ວງໄລຍະຖືກອາຍັດຊັບສິນ, ຢູ່ໃນຂະບວນການລົ້ມລະລາຍ ຫຼື ຖືກສານຕັດສິນເປັນຜູ້ລົ້ມລະລາຍ ຕາມກົດມາຍຂອງ ສປປ ລາວ; 
5. ຕ້ອງປະຕິບັດຕາມເງື່ອນໄຂອື່ນທີ່ຂະແໜງໄປສະນີ, ໂທລະຄົມມະນາຄົມ ແລະ ການສື່ສານກຳນົດ.

ກ່ອນອອກໃບອະນຸຍາດຖາວອນ ແມ່ນຕ້ອງໄດ້ອອກໃບອະນຸຍາດຊົ່ວຄາວ ຊຶ່ງມີອາຍຸການ 1ປີ ແລະ ຈະໄດ້ໃບອະນຸຍາດຖາວອນ ຕ້ອງປະຕີບັດແຜນການດຳເນີນທຸລະກິດ ສຳເລັດ ຢ່າງໜ້ອຍ 60%.